საერთაშორისო ფონდმა კურაციომ შეაფასა  UNICEF-ის პროგრამების შედეგები 5 წლამდე ასაკის ბავშვების სიკვდილიანობისა და ავადობის სტატისტიკის გაუმჯობესების მხრივ შემდეგ  ცენტრალური და აღმოსავლეთ ევროპის რეგიონის ხუთ ქვეყანაში: ყაზახეთი, ყირგიზეთი, მოლდოვა, სერბეთი და უზბეკეთი. ანგარიში აფასებს 12 წლიან პერიოდს 2000-დან 2012 წლამდე და მასზე მუშაობა 2014-2015 წლის განმავლობაში მიმდინარეობდა.

შეფასებამ აქცენტი გააკეთა შემდეგ მიმართულებებზე: 1. პროგრამების გავლენა ბავშვების ჯანმრთელობაზე;  2. თანასწორობის და შესაბამისობის პრინციპები; 3. სისტემური ცვლილებები;  4. UNICEF-ის წვლილი; 4. მდგრადობის საკითხი.

კვლევამ აჩვენა,
რომ შეფასების პერიოდში შემცირებულია 5 წლამდე ასაკის ბავშვთა სიკვდილიანობა და ავადობა, თუმცა არსებობს თანასწორობის ხარვეზები განსხვავებული  გეოგრაფიული მდებარეობის მქონე, გენდერული და სოციო-ეკონომიკური ჯგუფების წარმომადგენლებისთვის.  კვლევის შედეგებმა ცხადჰყო, რომ UNICEF-ის მიერ განხორციელებული პროგრამების მხარდაჭერით გადაიჭრა ახალშობილთა და 5 წლამდე ასაკის ბავშვთა სიკვდილიანობის და ავადობის ყველაზე მნიშვნელოვანი მიზეზები. პროგრამების წვლილი წარმატებული აღმოჩნდა ასევე ჯანდაცვის სისტემაში არსებული ხარვეზების მოსაგვარებელი ინტერვენციების იდენტიფიცირებისა და დანერგვის მიმართულებითაც.

ძირითადი რეკომენდაციები

შეფასების რეკომენდაცია იყო  ყურადღების გამახვილება თანასწორობის პრინციპის დაცვაზე, ბავშვთა სიკვდილიანობისა და ავადობის იმ მიზეზების აღმოფხვრაზე, რომელსაც წინა პერიოდში სრულად ვერ უპასუხა პროგრამებმა და ასევე, ჯანდაცვის სისტემის და სათემო დონეზე არსებული ხარვეზების მოგვარებაზე.

მეტის გასაგებად ჩამოტვირთეთ ანგარიში.

[vc_button url=”http://curatiofoundation.org/wp-content/uploads/2016/08/RKLA_6_MCE_report_CEECIS_2015-007.pdf” text=”ანგარიში” size=”” align=”left” type=”primary” outlined=”0″ icon=”” target=”_blank”]

ივლისის თვეში საერთაშორისო ფონდი კურაციოს მკვლევარები, ლელა სულაბერიძე და ივდითი ჩიქოვანი აივ-ინფექციისთვის მიძღვნილ გლობალურ კონფერენციას AIDS2016 სტუმრობდნენ, რომელიც სამხრეთ აფრიკის რესპუბლიკის ქალაქ დურბანში ჩატარდა.  AIDS2016-ის ფარგლებში 18000-მდე დელეგატი შეიკრიბა, რათა ემსჯელათ აივ-შიდსის მიმართულებით განხორციელებულ წარმატებებსა და გამოწვევებზე და  სხვა გლობალური ეპიდემიოლოგიური ტენდენციებზე.

ივდითი ჩიქოვანი IAEN -ის პრე-კონფერენციაზე  მოხსენებით წარსდგა და ისაუბრა  განვითარებადი ეკონომიკის მქონე ქვეყნებისთვის დონორების დახმარების შეწყვეტის საკითხზე. მოხსენების ფარგლებში აუდიტორიას გაეცნო კურაციოს მიერ შემუშავებული ჩარჩო (Framework), რომელიც აფასებს ქვეყნის მზაობას დონორული დახმარების შემდგომი პერიოდისთვის. მოხსენება აღმოსავლეთ ევროპის და ცენტრალური  აზიის რეგიონის 4 ქვეყნის მაგალითზე გაკეთდა. პრეზენტაცია ხელმისაწვდომია ბმულზე.

კონფერენცეიაზე კურაციოს მკვლევარებმა წარადგინეს ასევე 2 პოსტერი. ლელა სულაბერიძემ წარადგინა პოსტერი, რომელიც პოპულაციის ზომის განსაზღვრის ინოვაციური მეთოდის გამოყენებას ეხებოდა და განიხილავდა სირთულეებს, რომელიც სამიზნე პოპულაციის განსასაზღვრად ახალი მეთოდოლოგიის  გამოყენებისას იჩენს თავს. ელექტრონული პოსტერი ხელმისაწვდომია ბმულზე.

მეორე პოსტერი კი აივ-ეპიდემიოლოგიის სურათს ასახავდა საქართველოს  მსმ პოპულაციაში. პოსტერი ხელმისაწვდომია ბმულზე.

100-მდე ჯანდაცვის ექსპერტი შეიკრიბა ჟენევაში ივნისის ბოლოს,  რათა მხარი დაეჭირათ ჯანდაცვის საერთაშორისო პარტნიორობიდან (The International Health Partnership (IHP+)) უნივერსალურ ჯანდაცვა 2030-ზე (Universal Health Coverage (UHC 2030)) გადასვლის პროცესისთვის და ემსჯელათ ახალი კონცეფციის თაობაზე.

UHC 2030 იქნება პლათფორმა, რომელიც მრავალ დაინტერესებულ მხარეს გააერთიანებს. ეს იქნება სივრცე, სადაც თავს მოიყრის გლობალური ხედვა  ჯანდაცვის სისტემების გაძლიერებისა და უნივერსალური ჯანდაცვის განვითარებისთვის.

UHC 2030-ის მიზანია მხარი დაუჭიროს უნივერსალური ჯანდაცვის პროგრესს, მდგრადი განვითარების მიზნების (SDGs) ფარგლებში.

ღონისძიებაში მონაწილე მხარეებმა ერთმანეთს გაუზიარეს შეხედულებები UHC 2030-ის განვითარების შესახებ. შეხვედრას ესწრებოდნენ დონორი ორგანიზაციები, ჯანდაცვის სამთავრობო რგილი, როგორც დაბალი და საშუალო, ისე მაღალი შემოსავლების მქონე ქვეყნებიდან, არასამთავრობო ორგანიზაციები, სამოქალაქო, აკადემიური და კერძო სექტორის წარმომადგენლები.

საერთაშორისო ფონდი კურაციოს დირექტორმა გიორგი გოცაძემ მონაწილეობა მიიღო დისკუსიაში. როგორც მომხსენებელმა, ისაუბრა საქართველოს გამოცდილებაზე, ჯანდაცვის სისტემების განვითარების კუთხით. ამასთანავე გამოჰყო რამდენიმე მნიშვნელოვანი მიმართულება, რითაც UHC2030 შეძლებს გააძლიეროს ჯანდაცვის სისტემების განვითარება უნივერსალური ჯანდაცვის კუთხით გლობალურად და განსაკუთრებით სამხრეთ ევროპისა და აზიის რეგიონში.

„UHC 2030-ს შეუძლია მნიშვნელოვნად დაგვეხმაროს ენობრივი ბარიერის დანგრევაში, რათა მხარი დაუჭიროს ცოდნის ტრანზიციას. როგორც პროექტის კონცეფციაში ჩანს, ცოდნის გაზიარება UHC 2030-ის ერთ-ერთი მთავარი მიმართულებაა, მაგრამ სამწუხაროდ, ხშირად ცოდნის გავრცელება მხოლოდ ინგლისურ ენაზე ხდება,  იშვიათად მოიაზრება ესპანური, ფრანგული, ჩინური ან რომელიმე სხვა ენა გაეროს ქვეყნების 6 ძირითადი ენიდან.“ განაცხადა გიორგი გოცაძემ. პლენარული შეხვედრის ვიდეო-ჩანაწერი ხელმისაწვდომია ბმულზე.

UHC 2030 განაგრძობს მუშაობას ქვეყნების მხარდასაჭერად, ჯანდაცვის სისტემების გაუმჯობესებისა და უნივერსალური ჯანდაცვის უზრუნველსაყოფად.

აივ-თან დაკავშირებული სარისკო და უსაფრთხო ქცევები პატიმრებს შორის საქართველოში, 2015

საერთაშორისო ფონდი კურაციო აგრძელებს ქცევაზე ზედამხედველობის კვლევების განხორციელებას აივ-ის გავრცელების თვალსაზრისით საკვანძო ჯგუფებში. კვლევა მიზნად ისახავს საკვანძო ჯგუფებში აივ ინფექციის  გავრცელების შეფასებას; აივ ინფექციასთან მიმართებაში, ძირითადი სარისკო ქცევების განსაზღვრას და ადვოკატირებისა და პოლიტიკის შემუშავებისათვის მტკიცებულებების გენერირებას.

წინამდებარე კვლევა წარმოადგენს საქართველოში პატიმრებს შორის ქცევაზე და ბიომარკერებზე ზედამხედველობის (Bio-BSS) კვლევის შემდგომ ტალღას. პირველი ასეთი კვლევა ჩატარდა 2008 წელს, მარტივი რანდომული შერჩევის  გამოყენებით.

ამ ტალღაში შესწავლილ იქნა აგრეთვე სიფილისის პრევალენტობა პატიმრებში. კვლევა ჩატარდა საერთაშორისო ფონდი კურაციოსა და პარტნიორი ორგანიზაციების – “საინფორმაციო სამედიცინო-ფსიქოლოგიური ცენტრის თანადგომასა” და ინფექციური პათოლოგიის, შიდსის და კლინიკური იმუნოლოგიის სამეცნიერო-პრაქტიკული ცენტრის მიერ.

კვლევაში მარტივი რანდომული შერჩევის მეთოდის გამოყენებით, რეკრუტირებული იყო 300 პატიმარი 3 პენიტენციური დაწესებულებიდან თბილისში, ქუთაისსა და რუსთავში.

კვლევა ჩატარდა შიდსთან, მალარიასთან და ტუბერკულოზთან ბრძოლის გლობალური ფონდის ფინანსური მხარდაჭერით.

კვლევის ძირითადი შედეგები:

სოციო-დემოგრაფიული მახასიათებლები

• რეკრუტირებული პატიმრების მედიანური ასაკი იყო 34 წელი, 18-დან 78 წლამდე დიაპაზონით, განათლების დონის მიხევით, რესპონდენტების თითქმის სამ მეოთხედს (74.1%) მიღებული ჰქონდა საშუალო განათლება და პატიმრების ნახევარზე ნაკლები (46.8%) იყო დაქორწინებული.
• პატიმრობის ხანგრძლივობის მედიანაა 1.5 წელი, დიაპაზონით 0.08-დან 19 წლამდე.

სქესობრივი ქცევა

• სქესობრივი კონტაქტები პატიმრებში არ არის გავრცელებული (35.2%). უმრავლესობა (95.3% ) ამბობს, რომ ეს იყო ჰეტეროსექსუალური კონტაქტი, 4-მა რესპონდენტმა აღნიშნა როგორც ჰეტეროსექსუალური, ისე ჰომოსექსუალური კონტაქტები და მხოლოდ ერთმა პატიმარმა აღნიშნა, რომ ჰქონდა ჰომოსექსუალური კონტაქტი.
• რაც შეეხება კონდომის გამოყენებას ბოლო ანალური კონტაქტის დროს, 3-მა რესპონდენტმა 5-დან აღნიშნა, რომ გამოიყენა კონდომი, და სხვებმა კი არ გამოიყენეს, რის მიზეზადაც პარტნიორისადმი ნდობას ასახელებენ.

ნარკოტიკების მოხმარება და დამატებითი რისკები

• რესპონდენტების ნახევარზე ოდნავ მეტს (52.2%) ოდესმე მოუხმარია ნარკოტიკები. იმათგან, ვისაც ოდესმე მოუხმარია ნარკოტიკები, 87.9% ინექციურ მოხმარებას აღნიშნავს, ხოლო 68.8% – არაინექციურ მოხმარებას.
• რესპონდენტების  10.3%-მა აღნიშნა ნარკოტიკის არაინექციური მოხმარება ბოლო 12 თვის განმავლობაში, და მხოლოდ 8 პატიმარმა აღნიშნა, რომ მოუხმარია ინექციური ნარკოტიკები. აღსანიშნავია, რომ არც ერთმა რესპონდენტმა არ აღნიშნა ნემსებისა და შპრიცების საზიარო მოხმარება ბოლო 12 თვის განმავლობაში.
• აივ-ის მიმართ დამატებითი რისკები ასევე მცირე აღმოჩნდა. პატიმრების თითქმის ერთი მესამედი აღნიშნავდა პატიმრობის დროს ტატუირებას (31.6%). მხოლოდ ხუთმა პატიმარმა დააფიქსირა, რომ მოუხმარია საზიარო შპრიცები სამკურნალო მიზნით, ხოლო 3%-ს გამოყენებული ჰქონდა სხვის მიერ ნახმარი საპარსი. ალკოჰოლის მოხმარება ციხეებში ძალიან დაბალია – 3%-მა აღნიშნა მისი მიღება ბოლო 12 თვის განმავლობაში.

ცოდნა აივ-ზე და აივ ტესტირების პრაქტიკა

• რესპონდენტების უმრავლესობა (91.4%) აცხადებს, რომ სმენია აივ/შიდსის შესახებ.
• აივ-ის შესახებ ცოდნა, გაზომილი აივ/შიდსის საპასუხო ღონისძიებების პროგრესის გლობალური ანგარიშის ინდიკატორით, დაბალია – რესპონდენტების 23.3%-მა შეძლო, სწორი პასუხი გაეცა აივ-ის შესახებ შეკითხვებისათვის.  აივ-ის შესახებ ცოდნა არ შეცვლილა 2011-დან 2015 წლამდე.
• აივ-ზე ტესტირების შეთავაზება ციხეებში, ისევე, როგორც ტესტირების ჩატარება პატიმრების მიერ მომატებულია, რაც მეტყველებს პრევენციული პროგრამების მიერ პენიტენციურ სისტემაში დაარსებული ნებაყოფლობითი კონსულტირებისა და ტესტირების კაბინეტების წარმატებულობაზე.

სქესობრივი გზით გადამდები ინფექციები (სგგი)

• სგგი-ის შესახებ გათვითცნობიერებულობა მაღალია, რესპონდენტების უმრავლესობას (91.0%) სმენია სგგი-ის შესახებ, პატიმრების ცოდნა და მკურნალობისათვის მიმართვის ქცევა არ შეცვლილა 2012 წლის შემდგომ.

პრევენციული პროგრამებით მოცვა/მედია

• რესპონდენტების ნახევარზე ნაკლებმა ტელევიზია დაასახელა აივ-სა და სგგი-იზე ინფორმაციის პირველ წყაროდ, მას მოჰყვება სპეციალური ბუკლეტები, სხვა პატიმრები და არასამთავრობო ორგანიზაციების წარმომადგენლები.
• კვლევამ აღმოაჩინა სტატისტიკურად სარწმუნო ზრდა იმ რესპონდენტების პროპორციისა (25.2% 2015 წელს და 18.3% 2012 წელს, p<0.05), რომლებიც მოცული იყვნენ პრევენციული პროგრამით.

აივ-ის და სიფილისის პრევალენტობა

• საკვლევ შერჩევაში აივ ინფექციის პრევალენტობამ შეადგინა 2%. წინა კვლევაში პრევალენტობა იყო 0.3%. თუმცა, ის არ აღმოჩნდა სტატისტიკურად სარწმუნო.
• სიფილისის პრევალენტობა დაბალია. სიფილისის გავრცელების შედარება 2012 წლის კვლევის მონაცემებთან გვიჩვენებს სტატისტიკურად სარწმუნო შემცირებას (p<0.001).

სრული ანგარიში შეგიძლიათ წაიკითხოთ აქ.

17-18 მაისს, ვაშინგტონში EPIC immunization costing უმასპინძლებს სამუშაო სემინარს: იმუნიზაციის ღირებულების შესახებ, სახელწოდებით:  „რა ვისწავლეთ? რა შეგვიძლია ვაკეთოთ უკეთესად?“. საერთაშორისო ფონდი კურციოს აღმასრულებელი დირექტორი გიორგი გოცაძე და ბიზნესის განვითარების განყოფილების დირექტორი ქეთევან გოგუაძე სემინარის მონაწილეთა შორის არიან.

18 მაისს შეხვედრის ფარგლებში გაიმართება  დისკუსია: მდგრად ინსტიტუციონალურ კავშირებსა და იმუნიზაციის პროგრამის განხორციელების გაუმჯობესების შესახებ, დისკუსიის ერთ-ერთი სპიკერი იქნება ფონდი კურაციოს აღმასრულებელი დირექტორი გიორგი გოცაძე.

ღონისძიების შესახებ: EPIC მხარს უჭერს საზოგადოებას, რომელიც აკვირდება იმუნიზაციის პროგრამის ღირებულებას და ფინანსურ დინებებს, ამ ინფორმაციის გამოყენებით  კი ცდილობს გააუმჯობესოს პროგრამის  მუშაობა და მოიძიოს საჭირო რესურსები.

იმუნიზაციის პროგრამებში მსოფლიო მასშტაბით 300-მდე წევრია ჩართული, 50 სხვადასხვა ორგანიზაციიდან. წევრებს შორის ინფორმაციის გაცვლა და ახალი მიდგომების შემუშავება, შეგროვება საშუალებას იძლევა გამოიყენონ ახალი მიდგომები ვაქცინის მიწოდების გასაუმჯობესებლად.

სემინარი დაფინანსებულია ბილ და მელინდა გეითსების ფონდის ხელშეწყობით და ორგანიზებულია ჰარვარდის საზოგადოებრივი ჯანდაცვის სკოლის მიერ.

საერთაშორისო ფონდი კურაციო აგრძელებს ქცევაზე ზედამხედველობის კვლევების განხორციელებას აივ-ის გავრცელების თვალსაზრისით საკვანძო ჯგუფებში. კვლევა მიზნად ისახავს აივ ინფექციის  გავრცელების შეფასებას ამ ჯგუფებში; აივ ინფექციასთან მიმართებაში ძირითადი სარისკო ქცევების განსაზღვრას და ადვოკატირებისა და პოლიტიკის შემუშავებისათვის მტკიცებულებების გენერირებას.

წინამდებარე კვლევა წარმოადგენს ბიომარკერის კომპონენტით ქცევაზე ზედამხედველობის კვლევის უახლეს ტალღას (ასეთი კვლევები ტარდება 2007 წლიდან) საქართველოში მამაკაცებს შორის, რომელთაც სქესობრივი კონტაქტი აქვთ მამაკაცებთან (მსმ). ამ ტალღაში შესწავლილ იქნა აგრეთვე C ჰეპატიტის ვირუსისა და სიფილისის პრევალენტობა მსმ პოპულაციაში. კვლევა ჩატარდა საერთაშორისო ფონდი კურაციოსა და პარტნიორი ორგანიზაციების – “საინფორმაციო სამედიცინო-ფსიქოლოგიური ცენტრის თანადგომა” და ინფექციური პათოლოგიის, შიდსის და კლინიკური იმუნოლოგიის სამეცნიერო-პრაქტიკული ცენტრის მიერ.

კვლევაში გამოყენებულია ჯვარედინ-სექციური კვლევის დიზაინი.  რესპონდენტზე ორიენტირებული შერჩევის მეთოდის გამოყენებით, რეკრუტირებული იყო 18 წელზე მეტი ასაკის 415 მსმ საქართველოს 2 ძირითად ქალაქში: თბილისსა და ბათუმში.

კვლევა ჩატარდა შიდსთან, მალარიასთან და ტუბერკულოზთან ბრძოლის გლობალური ფონდის ფინანსური მხარდაჭერით.

კვლევის ძირითადი შედეგები:

სოციო-დემოგრაფიული მახასიათებლები

• რეკრუტირებული მსმ-ების ასაკის მედიანა 28 წელია თბილისში და 29 – ბათუმში. უმრავლესობას მიღებული აქვს საშუალო განათლება, არასდროს ყოფილა დაქორწინებული. მსმ-ების დიდ ნაწილს აქვს მუდმივი სამუშაო და უმრავლესობის საშუალო თვიური შემოსავალი 500 ლარია.
• კვლევას არ გამოუვლენია ალკოჰოლის პრობლემური (ყოველდღიურად) მომხმარებელთა და ინექციური ნარკოტიკის მომხმარებელთა დიდი რაოდენობა, იმის მტკიცებით, რომ მსმ-ებისა და ინმ-ების პოპულაციებს შორის არ არსებობს გადაფარვა.

სქესობრივი ქცევა

• მსმ-ებს ჰყავდათ  სხვადასხვა ტიპის მამაკაცი და ქალი პარტნიორები (რეგულარული, შემთხვევითი და კომერციული). მამაკაცი პარტნიორების (ანალური/ორალური პარტნიორები) მედიანური რიცხვი ბოლო 12 თვის განმავლობაში თბილისში შეადგენდა 6-ს, ხოლო ბათუმში – 5-ს. თბილისის მაჩვენებელი წინამდებარე კვლევით უფრო მეტია ვიდრე 2010 წლის კვლევის მონაცემებით იყო.
• იმ მსმ-ებში რომლებსაც ანალური პარტნიორები ჰყავდათ ბოლო 12-თვეში 63.2%-მა გამოიყენა კონდომი ბოლო ანალური კონტაქტის დროს თბილისში, ხოლო ბათუმში – 78.8%-მა. 2015 წლის თბილისის მონაცემი უმნუშვნელოდ აღემატება 2010 წლის კვლევის მონაცემებს (61.7%).
• ორივე ქალაქში მსმ-ების 50%-ზე მეტმა აღნიშნა, რომ ჰყავდა ქალი პარტნიორი (რეგულარული ან შემთხვევითი ან კომერციული) ბოლო 12 თვის განმავლობაში- 55.4% თბილისში და 53% ბათუმში. კვლევის მონაწილეთა ორ მესამედზე მეტმა (71.2% თბილისში და 65.9% ბათუმში) აღნიშნა ბოლო ქალ პარტნიორთან კონდომის გამოყენება. 2010 წლის შემდეგ აღინიშნება ამ მაჩვენებლის ზრდა თბილისში, ასევე, ეს მაჩვენებელი მაღალია ბათუმშიც.

კონდომები და ლუბრიკანტები

• აღინიშნება მცირედი ზრდა იმ მსმ-ების პროპორციისა, რომელთაც აღნიშნეს კონდომების მიღება პრევენციული პროგრამებიდან თბილისში ბოლო 12 თვის განმავლობაში 40.3%-დან 2010 წელს 43.5%-მდე 2015 წელს.
• კონდომების შესახებ ინფორმირებულობის დონე მაღალი რჩება კვლავ მიმდინარე კვლევის მონაცემებით.
• ინფორმირებულობა ლუბრიკანტების შესახებ მნიშვნელოვნად გაიზარდა თბილისში და ასევე მაღალია ბათუმში. წინა კვლევებთან შედარებით, ეს ინდიკატორები მაღალია, რაც შესაძლებელია აიხსნას ლუბრიკანტების უფასო მიწოდებით მსმ-ებისათვის პრევენციული პროგრამების მიერ, რაც დაიწყო 2014 წელს.

ცოდნა აივ-ზე და აივ ტესტირების პრაქტიკა

• აივ/შიდსის საპასუხო ღონისძიებების პროგრესის გლობალური ანგარიშის აივ-ის შესახებ ცოდნის ინდიკატორის ანალიზმა აჩვენა სტატისტიკურად სარწმუნო ცვლილება თბილისში 19.9%-დან 2010 წელს 30.4%-მდე 2015 წელს

(p – 0.00). ბათუმში ეს ინდიკატორი პირველად გაიზომა და იყო 35.2%.

• ბოლო ხუთი წლის განმავლობაში გამოვლინდა სტატისტიკურად სარწმუნო გაუმჯობესება მსმ-ების გათვითცნობიერებულობის კუთხით იმაზე, თუ სად არის შესაძლებელი, საჭიროების შემთხვევაში, აივ-ზე ტესტირების ჩატარება

(p – 0.00). ასევე სტატისტიკურად სარწმუნოდ არის გაზრდილი იმ მსმ-ების წილი, ვინც ჩაიტარა ტესტირება ბოლო 12 თვის განმავლობაში და იცის ანალიზის პასუხი. ეს შესაძლებელია აიხსნას სწრაფი (თითის ჩხვლეტა) აივ-ტესტის სტაბილური გამოყენებით გასვლითი სამუშაოების დროს პრევენციული პროგრამების ფარგლებში, რის შედეგადაც აივ-ტესტირება ადვილად ხელმისაწვდომია სამიზნე ჯგუფისათვის.

• მკვლევარებმა ასევე გაზომეს ტესტირების ჩატარების ცვლილება 2012 წლიდან 2015 წლამდე, და ისიც სტატისტიკურად სარწმუნო აღმოჩნდა (p  – 0.07).

ძალადობა

• კვლევის მონაწილეებიაღნიშნავენ ძალადობის პრაქტიკას სექსუალური ორიენტაციისა თუ სქესობრივი ქცევის გამო ბოლო 12 თვის განმავლობაში თბილისში 31%, ხოლო ბათუმში 4.7% და ეს მაჩვენებელი მნიშვნელოვნად არის გაზრდილი თბილისში 2012 წელთან შედარებით.

პროგრამებით მოცვა / მედია

• პრევენციული პროგრამებით მოცვა, რომელიც იზომება ინფორმირებულობით, თუ სად შეიძლება აივ-ზე ტესტის ჩატარება და ბოლო 12 თვის განმავლობაში კონდომების მიღებით, თბილისში გაიზარდა 20.9%-დან 2010 წელს 43.5%-მდე 2015 წელს. ეს ცვლილება სტატისტიკურად სარწმუნოა (p – 0.00). ბათუმში მოცვა უკვე საკმაოდ მაღალი აღმოჩნდა – დაახლოებით 40%.
• არასამთავრობო ორგანიზაციები, ინტერნეტი და მეგობრები წარმოადგენენ მთავარ და საუკეთესო გზას მსმ-ებისათვის შეტყობინებების გადაცემისათვის.

აივ-ის, C ჰეპატიტის ვირუსის და სიფილისის პრევალენტობა

• წარმოდგენილი კვლევის ყველაზე საგანგაშო მიგნება არის ის, რომ აივ ინფექციის გავრცელება თბლისიში გაიზარდა 6.4%-დან 2010 წელს 25.1%-მდე 2015 წელს . ბათუმშიც ძალიან მაღალია აივ-პრევალენტობა – 22.3%.
• რაც შეეხება სიფილისს, მისი გავრცელება საკმაოდ მაღალია თბილისში- 35%, მაგრამ არ გამოვლინდა რაიმე ცვლილება 2010 წლის კვლევასთან შედარებით, ხოლო ბათუმში ეს მაჩვენებელი 24.6%-ს უდრის.
• C ჰეპატიტის პრევალენტობა თბილისში 7%, და ბევრად მაღალი ბათუმში – 18.9%-ია.

კვლევის დეტალურად გასაცნობად გთხოვთ, იხილოთ ბმული.